Act 2 | AEY | STEP | Saen Pentikos Deel Ben cali hon euna age cunug cudun osolna ceguli bilein.

Acts 2

Kis Gun nen

1 Saen Pentikos Deel Ben cali hon euna ^{▼▼(2.1)“Pentikos Deel Ben” eu “Cabinadec Sab Ocnu Ceelec Deel Ben” ijan oso. Age Wok Pris 23.15-22 feiga. Deel ben i Pasowa Sab Jec Ben Deel caleceb deel 50 hedocob eu calen.} age cunug cudun osolna ceguli bilein. 2 Odocob saen nag bahic odi udududoc sao jobondec fufu ben bahic fuludoc cinigwe nimei jo hamol bileinna eu cunug ihoc len. 3 Odocob age ja belican cinigwe cagucagu dana filfil ilomogana taldu ninijen fein. 4 Kis Gun nimei dana ono bilein eu dewenegana cunug ihoc len. Age cunug beilamaga falicdocob je filfil madecnu Kis Gun ihoc cesuladen eu odi madein.

5 Odocob saen euna Juda dana leih Jerusalem ono bilein. Age cuha fecnu dana ititom hatu filfilnadec cegulein. 6 Saen age hutan eu dah mimeig dana am ben cegulein. Age osolosol je madec gug filfil mamadegin dah madeinnu age cunug dadanein. 7 Tumatumaeeig wawaga cacaden madein, “Dana je madegina i age cunug Galilidec. 8 Euqa ege cunug egena je gul mamadegin egedodoc ihoc dah madoqona eu adi? 9 Ege Patiadec, Midiadec, Ilamdecca. Ege Mesopotemiadec, Judiadec, Kapadosiadecca. Ege Pontasdec, Esiadecca. 10 Frisiadec Pamfiliadecca, Isipdec, Libia hatuna Sairini cemenugca. Ege leih Romdec dana. 11 Ege leih eu Juda dana bahic, ege leih eu Juda dana ibuldom. Ege Krit nuidec Arebiadecca. Euqa ege cunug egena je gulna Anutna gagadic odocnu dah moqona!” ein. 12 Odocob age cunug wawaga cacaden dadanecca sisildocobsisildocobein, “I eu cel gugnu?” ein. 13 Euqa leih age dana wawaga meleec eundecnu lelanec je madein, “Dana i age ceu tinca jecebil dalul aqeia!” ein.

Pita je maaden

14 Oodonqa Pita uqa aposel 11-pela gami caji tawimeig seeci dana am ben ninijen maaden, “Cotiel, Juda dana age, cunug Jerusalem bilegina ageca cehna ija dah mimitebil i cel gugnu ceteh i calena eu maadigen. 15 Age dana i age eu dalul aqeia ec cisdogina. Euqa qila i 9 kilok qasil himec. Eunu dana i age eu dalul qee aqel. ^{▼▼(2.15)Juda age qasil bahicna sab waca qee joloig. Eunu Pita uqa je i maden.} 16 Euqa ceteh i caleia eunu je hahun madec dana, Joel, wele maden:

17 ‘Anut madena, “Deel cit qocna ija ijana Kis dana cajaca cunugna basecdocomin nugian.
Age melemegail atagailca je hahun madec danawe ijana me je madoqagan.
Agena dana haunhaun eu age majaudocnu foqagan.
Agena dana toiatoia age bebelecna foqagan.
18 Mele, ijana cabi dana cajaca ha ijana Kis deel eunu agena basecdocomin neceb age je hahun madec danawe ijana me je madoqagan.
19 Ija gaga odoc sao ohisnaca, kobolkobol odoc mahanaca odigen.
Saen euna golacca, jaca, ja casuc benca caloqagan
20 Tibudna deel ben eu camasac migiannu dodoldodob casac cam eu tu ibuldugian.
Odocob jagel eu golacwe golca ibuldugian.
21 Odocob saen euna dana oso uqa Tibud ijanna utadocobfi Tibud uqa dana eu cahahadugian,” ena,’ en,” aden.
(Joel 2.28-32)

22 “Isrel dana, je i dah meigale! Jisas Nasaretdec, Anut uqa dana i nesili ehuden, uqana gadac eu odi. Age gemo uqa gagadic odoc mati odon, uqa kobolkobol odoc ha mati odon, uqa gaga odoc mati ihacaden. Eu Anut uqa Jisas ebenna age gemo odi odon agedodoc dogina. 23 Age Jisas i uqa dana age Mosesna loo je bisalu qee bilegina eu ebenegana mudecebil age na babalecna tuitu qocobil cal men eunu Anut uqa wele don, Anut uqa wele eunu cois maden. 24 Euqa cal mec uqa gihacdocwe qee. Cal mec ^{▼▼(2.24)Grik je i bahic eu “oloqanih”} uqana gagadic odoc qee mudimei haun ehuden. Eunu Anut cal mecnadec haun tulidocob cajen. 25 Euha Dewid uqa Jisasnu maden:

‘Ija dugina, Tibud uqa ijaca gaid bilina.
Uqa ija ebeni meulana isec bilina eunu culumen oso ijaca hocobfi ija qee qeleligaun, qee cucuiigaun.
26 Eunu ija wawi celeboen. Ija conina ceelec je madem.
Anut hina ija doloni cal mecna ^{▼▼(2.26-27)Grik je i bahic eu “oloqanihna”} qee culdugaun.
Hinana cabi dana gun eu hina culdocom uqa deweg qee huluoiaun.
Eunu ija cal mec dana qa ija jaen mudecnu gaid wawi madena odi.
28 Hina cebac coboc jic wele ihactem.
Odocob saen hina ijaca bilimeg ija wawi celeboecnu itegan,’ en,” aden.
(Buk Song 16.8-11)

29 “Cotiel, age du cuhadocnu ija saluqi u maadigen. Egena sihul gugnadec dana, King Dewid, wele bilen uqa cal meceb heel cisein, euqa uqana qalqal eu ene egeca deel ina bilia. 30 Uqa Anutna je hahun madec dana, odocob uqa Anut je cagoc oso madon, ‘Ija dana hinana sihulnadec hibna caligian hinana king cudunna mudigen,’ don eu don. 31 Eunu Dewid uqa Anut hibnanu ceteh oso odocob caleceb fen. Odimei Anut uqana Krais eu cal mecnadec ceseli cajigiannu maden:

‘Anut cal mecna ^{▼▼(2.31)Grik je i bahic eu “oloqanihna”} uqa qee culdol.
Uqa deweg ganac ha heelna qee huluel,’ en,” aden.
32 “Anut uqa Jisas i cal mecnadec haun tulidocob cajen eunu ege cunug fimeb qasali maadoqona. 33 Uqa Jisas suli u sao ohis ehi ti eben meulana isec muden. Odimei Memige Anut uqa wele maden odi Kis Gun uten. Odocob Jisas Kis Gun basecdocob nen eu ceteh qila i fegina, dah megina. 34 Eu odi ha Dewid uqa Jisas sao jobonna ten odi qee tel qa uqa maden:

‘Anut Tibud uqa ijana Tibud odi madon,
“Ijaca hu ebeni meulana isec bibilem
35 ija odocomin hinana cad cunug hu ninijebil
hina jaimna lahacadegan,” don,’ ec maden,” aden.
(Buk Song 110.1)

36 “Eunu Isrel dana cunug age doiga, Jisas i age na babalecna tuitu qocobil cal men eu Anut uqa Tibud Kraisca mudeceb uqa ege Cahahagec calen bilia!” aden.

Dana mati age tului falicdumeig wa joc oin

37 Dana age odi dah mimeig age wawaga qon. Odocob age Pita aposel leihca maadein, “Cotigeil, ege qila adi odocnu?” adein.

38 Odocob Pita maaden, “Age osolosol agena silailnu tului falicdumeig Jisas Krais ijanna wa joc ocobil Anut agena silail cagasiadigian. Odocob Anut uqa Kis Gun bagolwe adigian. 39 Eu odi ha Anut uqa wele maaden odi agenuca, age talacunugailnuca Kis Gun adigian. Odocob dana leih onoca bileginanu ha adigian. Cunug Tibud, egena Anut, utaadeceb hoqagan eu uqa Kis Gun adigian,” aden.

40 Pita haun maadimei dahiniga hewec je maaden, “Anut uqa qisol dana qila bilegina wadacadec ben bahic adigian. Eunu age wadacadec owainnu agedodoc cahahaadec adecnu agena qisol kobol culeiga!” aden. 41 Odocob geh bahic uqana jenu wawaga meleeceb wa joc oin eu 3,000 odi casacdecca gabandoin.

Kristen kobol me bahic calen

42 Odocob age aposel agena iwaladec je dah mecnu gale adoloi. Age cegulecnuca, bred feni jecnuca, inondocnuca gaid odoloig. ^{▼▼(2.42)Doc dana mati age odi cisdogina. Saen euna Kristen age cunug cegulimeig sab joloig. Ji hedumeig age Jisas deweg golaccanu cisdocnu sab joloig.} 43 Oodogin Anutna kobolkobol geh bahic gaga odoc ha geh bahic aposel ebenegana odoin eunu cunug age cucuiein. 44 Cunug age wawaga meleecca age wawaga osol meceb bilein. Agena ceteteh eu agena dih qee elein eu cunug agena. 45 Age cehewanagaca agena mahaca suldodoig meen qaig eu umeig dana filfil age sabca qee cetetehca qee eu siwiadoloig. 46 Deel cunug age tempelna age wawaga osolna gabandu biloloig. Odimeig age agena jonana bred feni jejeig age wawaga meca celeboecca sab gabandu joloig. 47 Age Anut binan susulegin dana cunug agenu culunuga oin. Odocob deel cunugna Tibud uqa cahahaaadi dana cajaca am haun eu cedi ahu gabanaadien.